UNA VITA DA CRUCHÈL

EL CRUCHEL

EL CRUCHEL (ossia) EL GABIÈN

Da chi dirup davanti al mer
T’spichev el vol, pò te planev
Sa cl’eli bianc in tun ciel turchen
D’acord sal vent t’fev trasportè
Per po’ gì a seda, sora le ond
Pen d’forza, d’vita e fecond

E da chel mer, azzur e pulit
T’peschev el pesc non inquined
E po t’arturnev in’dò t’er già tufed
Riempend el bec par i pulcen
Per po’ arturnè veloc tel vent
A portè ma la prole el nutriment

Spess a t’ho invidied cla libertà
Chel bel grup, cla vita gregaria,
Sa tutt chi’amigh chi s’vibria in tl’aria
Che sa te i danza e an t’sì mei sol
At’guard e m’sembra d’veda un sovren,
Da te a vleva imparè a volè, con j’aroplen

T’sì grand amic del pescador
Che par lavrè el sfida le ond
E po el getta la ret d’là dle su spond
Sperand d’rempì el su barcon
E in tel port arturnè ad atrachè
Do moj e fioj jè malè ad aspetè

El storme d’gabien j’aspeta el ritir
De cla ret a strascic pena de pesc
I sà che da cla ret qual’cò par lori esc
E t’sent un coro d’schiamaz in tel ciel
Con si pregasa mal Dio ch’ja creed
Par el banchet ch’ja prepared

A jabit a nord do l’Italia la s’piga
Tel San Bartol, ch’el fa da frontiera,
ma l’Adriatic, in tla fascia costiera,
sa j’occh grand con quei d’un fiulen
At’ved ogni giorne dalla mi fnestra
Vicen al tu nid, tra cla giala ginestra

E po da giovanot, da cl’alta prigion,
De chel Castel ch’schiema Angioen,
Insiem ma cla luc cla splend al maten,
Sognand e sperand la mi libertà,
A jo amired i tu tuf in tel Mer de Gaeta
Sa cla potenza d’na bianca cometa.

Tutti i te chiema: Gabbien Real
Ma or a piagn par te, volatil amic,
Parchè par quatre baioc l’on el ta tradit
L’ha rott gl’ingranag dell’ecosistema
El ciel l’è tut sporc, el Mer avelened
C’è tropa plastica e an tà più pesched

An t’cerc piò in tle Mer la tu pastura
Ma ti centre urben ta fat la tu dimora
In tla colena che d’fior par’gnent odora
T’vol sora montagn de spazatura
Cla mondeza che l’om el se disfat
Com na’volta i feva i chen e i gat

Fra chi rifiut at vegh ora a planè
T’cerc tla mondezza el tu nutriment
Ta lasced la rup, par stè in mez al cement.
Ta det adio ma chi gran spazi celest
E t’grid fort ma chel ciel e ma chel vent
El tu vers strident, el tu piant, el tu lament.

Vitaliano Vagnini